أخبار وطنية زكريا بوقيرة يقدّم مجموعة من الأجوبة عن أسئلة يتناقلها المواطنون بشأن تلاقيح العيد
نشر في 19 جويلية 2021 (21:08)
قدّم الطبيب زكريا بوقيرة مجموعة من الاجوبة على اسئلة يتناقلها العديد من المواطنين بشأن تلاقيح العيد ننقلها لكم لتعميم الفائدة:
برشة عباد تسئل وموش فاهمة بخصوص حملت التلقيح غدوة
خلي نجاوبكم على شوية اسئلة:
-شنوما التلاقيح غدوة؟
فما زوز Astrazeneca لإلي فوق 45 سنة وsinopharm لإلي أقل
-الsinopharm هو بيدو الsinovac؟
لا موش نفس التلقيح.
صحيح الزوز تلاقيح شنوة أما موش نفس الفعالية
الsinovac إلي اسمو زادة coronavac الفعالية متاعو في 55%
والsinopharm الفعالية متاعو في 80%
هذا على الإصابات بأعراض خفيفة.
أما على الحالات الخطيرة والموت الزوز فوق ال80%
-والAstrazeneca شنية الفاعلية متاعو ؟
على الإصابات الخفيفة نسبة الفاعلية في 70% وفي الإصابات الخطيرة والموت تتجاوز ال-90%
-هاو قالو ينجم يعمل تخثر في الدم؟
صحيح ينجم يعمل تخثر في الدم أما نسبة التخثر في حدود 5 على كل مليون شخص
أما زادة لازم تعرفوا أن الكوفيد بيدو يعمل تخثر أما المرة هذي بنسبة بين 5 و-10%
معناها كان تونس كاملة تعمل التلقيح فما 50 شخص بش يعملوا تخثر
وكان تونس كاملة تمرض فما بين 500 ألف ومليون تونسي بش يعملوا تخثر
- على السفر لأوروبا صحيح فما مشكلة ؟
صحيح فما مشكلة مع التلاقيح الصينية والروسي أما ال-Astrazeneca جوو باهي
المشكلة راهي politique مش صحية
هذا marché متع مليارات الدولارات وأوروبا تحب تدز الدول أنها تشري التلاقيح متاعها وإلا متع اصدقائهم الأمريكان
نتصور من هوني لستة شهور اخرين بش يستعرفو بالتلقيح لخرين
أما من هوني لوقتها إلي يسافر يتحسب موش ملقح ولازمو يشد الحجر الصحي الإجباري
-شكون ما عندوش الحق يلقح؟
إلي مرض عندو أقل من 3 شهور
إلي توا عندو أعراض: سخانة وجيعة راس قراجمو منفوخة فشلة وجيعة في المفاصل في العضلات في الكرش إلي عندو الردة إلي كرشو تجري إلي الشم ولا الذوق ولا السمع نقصو إلي عندو حبوب ولا بلايك ضهرولو على جلدتو وإلا أي أعراض جديدة ضهرت في المدة الأخيرة
مافيها باس زادة كان تعملوا test rapide قبل ما تمشيو للمركز
النساء الحبالة ما عندهمش مشكلة بالعكس هما عندهم أولوية والكوفد مخطر برشة ليهم وللbébé متاعهم
كيف كيف إلي يرضعوا ما فما حتى قلق وفما شكون يقول أنها تنجم في بعض الحالات تعطي مناعة للصغير
إلي عندهم حساسية ما دمها موش حساسية من واحد من مكونات التلقيح ينجمو يعملوه أما ماذا بيهم يجيبوا جواب من عند طبيبهم قبل ما يلقحوا
نشالله نكون جاوبت على اسئلتكم
مرة أخرى غدوة ردوا بالكم من العدوى
ننصحكم إشريو الmasque FFP2 إلي كي الجرمانة ب8 د وإلا كان ما تنجموش حطوا زوز كمامات فوق بعضهم
بش يبدا فما إكتضاض كبير وفرضية العدوى كبيرة برشة
حاجة أخرى غدوة سخانة ولعباد الكل بش تبدى على اعصابها
حاولوا وسعوا بالكم وبال لعباد إلي بحذاكم
بش نكمل بنداء للعزاف والموسيقيين متاعنا
نتصور فكرة باهية كان تجيبوا غدوة آلات الموسيقى متاعكم للمركز منها تفرهدو لعباد وتخففو علاهم الصف ومنها نتومة تعملوا جو وتعطيو صورة جديدة وباهية لبلادنا
ربي يحميكم الكل".
